SAN FERNANDO CITY, LA UNION – Naminsan pay nga indarirag ti Department of Agriculture – Regional Field Office 1 ti kinapateg ti pannakitinnulong ti publiko tapno nadardaras a maparmek ti African Swine Fever (ASF) ditoy rehion.
Daytoy ket gapu ta agingga iti agdama ket nangato latta ti kaso ti ASF iti rehion partikular kadagiti probinsia ti Pangasinan, La Union, ken Ilocos Sur.
Iti pannakiuman ken ni Dr. Allen Mae Doctolero, Regional ASF Coordinator ti DA-Regulatory Division, imbinsa-binsana a kadagiti nasao a probinsia, dumanonen iti 55 a munisipio ken 284 a barangay ti apektado iti sapasap a rehion a bukbuklen ti 36 a munisipio ken 185 a barangay idiay Pangasinan; 14 a munisipio ken 61 a barangay iti La Union; ken lima nga ili ken 38 a barangay met iti probinsia ti Ilocos Sur.
Kabayatanna, dumanonen iti P83,946,160 ti naited a tulong ti DA region 1 kadagiti amin nga apektado ti ASF kadagiti tallo a probinsia.
Segun ken ni Dr. Doctolero, iti nasao a bilang, 53,030,000 ti naipaayen para iti Indemnification Program wenno ti pannakaipaay ti P5,000 a cash assistance para iti tunggal baboy a naipasidong iti culling.
Malaksid iti indemnification, P30,916,160 met a balor dagiti 762 a dinguen kas iti baka, ken 3,352 a free range chickens ti naited a kas paset ti Recovery Plan tapno mangabaroanan manen dagiti napukawan iti taraken a baboy.
Mainaig iti daytoy, inlawlawag pay ni Dr. Allen Mae a ti ASF ket saan laeng a direkta a mayakar manipud iti maysa a baboy ngem ketdi, ad-adda ken nalaklaka a maiwaras daytoy babaen ti swill feeding wenno panagpakan iti arasaw wenno tedda a taraon manipud kadagiti panganan ken hotel.
Gapu iti daytoy, inyunay-unay na a no mabalbalin ket agridam koma dagiti agtartaraken iti baboy tapno saan da a maakaran iti sakit ken maisakripisio ti nasao a pagbiagan.
Iti met biang ti Departamento, tuloy ti panangisayangkat daytoy iti culling iti kalawa a 500 a metro manipud iti index case wenno ground zero tapno maipanamnama a saanen a maakaran pay dagiti dadduma a taraken a baboy iti uneg ti maysa a barangay.
Aminado ni Doctolero a maysa a karit ti pannakaisayangkat ti culling gapu ta adda latta dagiti agtagikua iti baboy nga agkedked a mangisakripisio kadagiti taraken da uray no asideg dagitoy iti impektado iti ASF.
Tapno maipanamnama a nasayud ti pannakaipaay ti tulong ket kasapulan ti nairut a validation, kas iti panagala iti kaskenan nga ebidensia a pakaibilangan ti geotagged a ladawan dagiti apektado, babaen metten ti pannakibinnadang dagiti opisial ti barangay, local government units, agingga iti Office of the Provincial Veterinarian.###
