LA UNION – Naituding a maipaima kadagiti 75 nga agtutubo manipud iti rehion Ilocos ti sag-P50,000 a pagpuonan dagitoy manipud iti “Young Farmers Challenge: Kabataang Agribiz Competitive Grant Assistance Program ti Department of Agriculture.
Daytoy ket kalpasan a nakapasada iti nasurok tallo bulan a panagarisit dagiti hurado ken secretariat sipud pay idi bulan ti Mayo ita a tawen.
Iti palawag ni Ms. Rhoda Galban, focal person ti nasao a programa, kinunana a manipud iti 109 a nagaplikar ken nangisumitir iti business model canvass (BMC) dagitoy a bukbuklen dagiti indibidual ken grupo, dagiti laeng nasao nga awardees ti nakapasa
“Ti Kabataang Agribiz ket mangipaay iti financial grant para kadagiti agtutubo tapno makairugida iti negosio dagitoy kas maibasar iti insumitirda a business proposal,” palawag ni Galban.
Apaman a maited ti nasao a gatad kadagiti awardees ket mangrugin ti implementasion ti agri-enterprise agingga iti sumaruno a tukad ti kompetision wenno iti Regional level ken iti maudin a national level.
Innayon pay ni Ms. Galban a kangrunaan a kalikagum ti nadakamat a programa ket tapno maguyugoy dagiti agtutubo a tumapog iti panangimaton ti agri-based enterprises.
Dagiti laeng pito nga awardees a taga-probinsia ti La Union ti pisikal a dumar-ay iti awarding ceremony inton Agosto 20 ita a tawen bayat a babaen met ti virtual dagiti 29 manipud Pangasinan, 26 iti Ilocos Sur ken 13 a taga-Ilocos Norte. ###
